Endri Fuga shet vilën 3-katëshe, preferon rezidencë për banim

A thua ka me çfarë t’i justifikojë paratë me të cilat bleu vilën 3-katëshe tek Kodra e Diellit, Drejtori i Informacionit i Kryeministrit, Endri Fuga? Si e nxorri në shitje për 300 mijë euro dhe ku do të transferohet familja e tij e vogël? Foto ekskluzive

Edhe pse nuk i ka më shumë se gjashtë vjet që i thotë punës “mirëmëngjes” dhe firmos në bordero, Drejtori i Informacionit i kryeministrit Rama ka plot për tu krenuar me pasuritë që ka vënë. Dhe nuk e kemi fjalën për bëma nga ato që tregohen mes miqsh e që i dinë vetëm pak njerëz, siç mund të jenë llogari off shore apo biznese dhe transferta të fshehura nën emra të tjerë. Këto ata mundohen ti mbulojnë disi dhe për to janë në dijeni shumë pak persona. Problemi qëndron tek ato që mbeten dhe që me sa duket janë aq shumë, sa personazhe të rëndësishëm në këtë qeveri, siç është de facto edhe Endri Fuga, as i fsheh dot e as mundohet ta bëjë këtë gjë tashmë.

Kështu sado që deri tani është munduar të tregohet i kujdesshëm, Endri nuk e mbajti dot gjatë të fshehur vilën 3-katëshe ku jetonte me bashkëshorten dhe dy fëmijët. Banesa luksoze e njeriut që drejton marrëdhëniet me mediat e Kryeministrit, e cila ngrihet tre kate mbi tokë, pa përmendur ato nëntoksore, është e njohur në zonën rezidenciale të Kodrës së Diellit, ku siç dihet banojnë njerëz të pasur dhe të veçuar nga pjesa tjetër e kryeqytetit.

Por, pak më shumë se një vit më parë, Endri u shtua me fëmijën e dytë (fëmija i parë i Fugës, vajzë, ka lindur vetëm pak muaj pas celebrimit në martesë me Besa Pëllumbin në vitin 2014), dhe duket se kjo i ka rritur kërkesat e familjes për më shumë hapsirë paçka se tre katet e vilës së Kodrës së Diellit duken më se të mjaftueshme për një familje prej katër personash. Nga ana tjetër, duke parë se oligarkët e këtij vendi, ata që Rama i dorovit shpesh dhe hapur, janë vendosur në të njëjtën zonë banimi në periferi, nëpër vila që i kapërcejnë shifrat e 1 milionë eurove, duket se i ka hapur oreksin edhe Fugës. Prandaj ai e ka nxjerrë në shitje “shtëpinë”e parë që ka fituar me “mund e me djersë”, e cila është vlerësuar plot 300 mijë euro, për të marrë një tjetër, më të madhe, më me diell dhe sidomos më me shumë haspirë. Siç duket kjo e Kodrës së Diellit ka qenë shumë afër me frymorë të tjerë të zakonshëm dhe Fuga kërkon pak më shumë privatsi. Tanimë familja është zhvendosur në periferi të Tiranës në një tjetër vilë, me dy kate kësaj radhe, por natyrisht më me shumë hapsirë, më luksoze në ndërtim, me pishinë dhe oborr ku të luajnë familjet.

Le të jetojnë të gëzuar në shtëpinë e re familja e Endri Fugës! Por natyrshëm lind pyetja me çfarë e vuri këtë pasuri këshilltari shpirtëror i kryeministrit, paga e të cilit nuk e bën të mundur blerjen e një vile 300 mijë euroshe? Për më tepër që Endri nuk i ka më shumë se 6 vjet vjetërsi pune! E njëjta gjë vlen edhe për bashkëshorten e tij, e bija e avokatit Mark Pëllumbi, Besa, e cila pavarësisht se punon në një kompani të madhe, siç është “Deloitte”, nuk i justifikon të ardhura të kësaj kategorie. Aq më tepër që për çiftin në fjalë nuk diskutohet vetëm shtëpia ku jetojnë apo vlera të tilla “qesharake” si 300 mijë euro. E gjithë jeta luksoze e tyre nuk ka asnjë lloj justifikimi.

Jo më shumë se dy vjet më parë, Fuga organizoi ceremoninë e dasmës (celebrimi është bërë në vitin 2014, ndërsa ceremonia madhështore në maj të vitit 2016), në Kotor me rreth 470 të ftuari. Përveç darkës dhe akomodimit të të ftuarve të hotelet luksoze të Kotorrit, dasmorët bënë edhe xhiro me jahte luksoze në bregun Dalamat dhe askush nuk pyeti se nga dolën këto para për shpënzime të tilla luksi. E të mendosh që behet fjalë vetëm për shpenzime që duken sheshit, dhe jo për shumë të tjera që i dinë një rreth më i vogël njerëzish e që përfshijnë pasuri të paluajtshme, udhëtime të shpeshta luksi etj. etj. Për të gjitha këto, nga dalin paratë?

P.S. Zhurmën për martesën e vet luksoze, ca vite më parë, Erion Veliaj e “justifikoi” duke thënë se kishte punuar duke shitur fiq që i vogël dhe e kishte ndihmuar mamaja me kursimet e saj. Jemi kurioze të dimë, cili do të jetë varianti i Fugës? Prej nga burojnë këto para për pasuritë e vëna Z. Fuga?/Pamfleti

Vila e Fugës

Loading...
Të ngjashme

Leave A Reply

Your email address will not be published.

This site uses Akismet to reduce spam. Learn how your comment data is processed.